काठमाडौं । नेपाली राष्ट्रियता, संस्कृति, सम्पदा र मौलिक पहिचानलाई कलामार्फत उजागर गर्ने उद्देश्यका साथ ‘कला महोत्सव २०८३ – आर्ट एक्जिबिसन २०२६’ काठमाडौंको बबरमहलस्थित नेपाल कला परिषद् (नेपाल आर्ट काउन्सिल) मा आयोजना गरिएको छ।
आर्ट बुमको आयोजनामा ‘Celebrating Nepali Nationality and Culture’ (नेपाली राष्ट्रियता र संस्कृतिको उत्सव) भन्ने मूल नारासहित भइरहेको प्रदर्शनीमा नेपालको समृद्ध सांस्कृतिक परम्परा, ऐतिहासिक सम्पदा, राष्ट्रिय पहिचान तथा प्राकृतिक सौन्दर्यबाट प्रेरित विविध चित्रकला र सिर्जनाहरू प्रदर्शित गरिएका छन्।
पाँच दिनसम्म सञ्चालन हुने यस प्रदर्शनीमा कला पारखी, विद्यार्थी, संस्कृतिप्रेमी तथा सर्वसाधारणको उल्लेखनीय सहभागिता रहने आयोजकले विश्वास व्यक्त गरेको छ। कार्यक्रमलाई शैक्षिक संस्था, विभिन्न कर्पोरेट संस्था तथा स्थानीय व्यवसायिक प्रतिष्ठानहरूको समेत सहयोग प्राप्त भएको छ।
नेपालका विविध जातीय परम्परा, सांस्कृतिक सम्पदा तथा राष्ट्रिय प्रतीकहरूलाई कलात्मक अभिव्यक्तिमार्फत प्रस्तुत गरिएको यस प्रदर्शनीले कला र संस्कृतिबीचको सम्बन्धलाई अझ सुदृढ बनाउँदै नेपाली सांस्कृतिक पहिचानप्रतिको सम्मान र गौरव अभिवृद्धि गर्ने अपेक्षा गरिएको छ।
कला, संस्कृति र राष्ट्रियताको साझा उत्सवका रूपमा आयोजना गरिएको ‘कला महोत्सव २०८३ – आर्ट एक्जिबिसन २०२६’ आगामी असार ९ गते (जुन २३) सम्म सञ्चालन हुनेछ। प्रदर्शनीले कलाकार, कला अनुरागी तथा सर्वसाधारणलाई एकै थलोमा भेला गराउँदै नेपाली सिर्जनशीलता र सांस्कृतिक आत्माको उत्सव मनाउने अवसर प्रदान गर्ने आयोजकले जनाएको छ।
