युरोपेली मुलुक पोल्यान्डमा पहिलोपटक ‘नेपाल फेस्टिभल–२०२६’ आयोजना हुने भएको छ। आगामी जुलाई ११ मा पोल्यान्डको ऐतिहासिक शहर पोजनानमा हुने महोत्सवले नेपालको कला, संस्कृति, भाषा, परम्परा, पर्यटन तथा राष्ट्रिय पहिचानलाई अन्तर्राष्ट्रिय समुदायसमक्ष परिचित गराउने लक्ष्य लिएको छ।
हामी नेपाली ग्लोबल–पोल्यान्डको आयोजनामा पोजनानस्थित ऐतिहासिक इम्पेरियल क्यासल (Imperial Castle) मा हुने महोत्सव शनिबार बिहान ११ः३० बजे सुरु हुनेछ। आयोजकका अनुसार जर्मनीका लागि नेपालका कार्यवाहक राजदूत तथा पोल्यान्डसमेत कार्यक्षेत्र हेर्ने सागरप्रसाद फुयाँलको प्रमुख आतिथ्यमा कार्यक्रम सम्पन्न हुनेछ। कार्यक्रममा पोल्यान्ड सरकारको संस्कृति विभाग, नेपाल चेम्बर अफ कमर्स, स्थानीय सरकारी निकाय, कूटनीतिक नियोग तथा विभिन्न अन्तर्राष्ट्रिय संस्थाका प्रतिनिधिहरूको समेत सहभागिता रहनेछ।
महोत्सवलाई दुई चरणमा सञ्चालन गरिने आयोजक संस्था हामी नेपाली ग्लोबल–पोल्यान्डकी अध्यक्ष शान्ति श्रेष्ठले जानकारी दिइन्। पहिलो चरणमा Centrum Kultury ZAMEK बाट नेपाली राष्ट्रिय झण्डासहित भव्य सांस्कृतिक र्याली निकालिनेछ। र्यालीमा विभिन्न जातजातिका मौलिक नृत्य, सांस्कृतिक झाँकी, परम्परागत भेषभूषा तथा नेपाली संगीतमार्फत पोजनानका मुख्य सडक र चोकहरू परिक्रमा गरिनेछ। आयोजकले पोल्यान्डभर रहेका नेपालीलाई राष्ट्रिय झण्डासहित सहभागी भएर नेपालको राष्ट्रिय एकता, सांस्कृतिक गौरव र पहिचानलाई विश्वसामु प्रस्तुत गर्न आग्रह गरेको छ।
दोस्रो चरणअन्तर्गत दिउँसो १ः३० बजे इम्पेरियल क्यासलको मुख्य सभाहलमा औपचारिक कार्यक्रम आयोजना हुनेछ। कार्यक्रममा कार्यवाहक राजदूत फुयाँल, पोल्यान्ड सरकारका प्रतिनिधि, कूटनीतिक समुदाय, प्रवासी नेपाली तथा पोलिस नागरिकहरूको उल्लेखनीय उपस्थिति रहने अपेक्षा गरिएको छ।
अध्यक्ष श्रेष्ठका अनुसार नेपाल प्राकृतिक सौन्दर्य, सांस्कृतिक विविधता र प्राचीन सभ्यताको धनी राष्ट्र हो। महोत्सवमार्फत पोलिस नागरिकलाई नेपालको मौलिक संस्कृति, कला, परम्परा, खानपान र पर्यटनका सम्भावनाबारे परिचित गराउनुका साथै नेपाल भ्रमणका लागि प्रेरित गर्ने उद्देश्य रहेको उनले बताइन्। उनका अनुसार यो कार्यक्रम केवल सांस्कृतिक उत्सव मात्र नभई नेपाल र पोल्यान्डबीच जनस्तरको सम्बन्धलाई अझ सुदृढ बनाउने महत्वपूर्ण अवसर पनि हुनेछ।
कार्यक्रम संयोजक **भविन्द्र गाहा मगर (भविन)**ले महोत्सवलाई ऐतिहासिक, व्यवस्थित र भव्य बनाउन विभिन्न उपसमिति गठन गरी तीव्र तयारी भइरहेको जानकारी दिए। “हाम्रो लक्ष्य पोल्यान्डमा एक दिनका लागि ‘मिनी नेपाल’को अनुभूति गराउनु हो। नेपालका विभिन्न जातजाति, भाषा, संस्कृति, कला र परम्परालाई एउटै मञ्चबाट विश्वसामु प्रस्तुत गर्ने प्रयास गरेका छौं,” उनले भने।
सन् २०२१ मा पोल्यान्ड सरकारको केआरएस (KRS) मा विधिवत् दर्ता भएको हामी नेपाली ग्लोबल–पोल्यान्ड त्यहाँ क्रियाशील नेपाली संस्थामध्ये एक हो। संस्थाले नेपाली समुदायबीच एकता अभिवृद्धि, सामाजिक सहकार्य, सांस्कृतिक संरक्षण तथा अन्तर्राष्ट्रिय स्तरमा नेपालको प्रवर्द्धनका क्षेत्रमा निरन्तर सक्रिय भूमिका निर्वाह गर्दै आएको छ।
आयोजकका अनुसार ‘नेपाल फेस्टिभल–२०२६’ पोल्यान्डमा नेपालको सांस्कृतिक कूटनीति, पर्यटन प्रवर्द्धन र नेपाली समुदायको पहिचानलाई नयाँ उचाइमा पुर्याउने ऐतिहासिक कार्यक्रम बन्ने विश्वास गरिएको छ। महोत्सवले नेपाल र पोल्यान्डबीचको सांस्कृतिक सम्बन्धलाई अझ प्रगाढ बनाउनुका साथै नेपालको कला, संस्कृति र पर्यटनलाई अन्तर्राष्ट्रिय मञ्चमा थप प्रभावकारी रूपमा स्थापित गर्न महत्वपूर्ण योगदान पुग्ने अपेक्षा गरिएको छ।
