‘Content for Good’ नाराका साथ Google Gemini ले पहिलोपटक सुरु गरेको ए आइ चलचित्र अवार्डमा फ्रान्सेली भाषामा बनाइएको ९ मिनेटको छोटो फिल्म LILY ले १० लाख डलर हात पार्न सफल भएको छ । AI सिर्जनात्मक प्रक्रियामा एउटा शक्तिशाली साझेदार बन्न सक्छ भन्ने विश्वासका साथ One Billion Followers Summit सँगको साझेदारीमा आयोजित यस प्रतियोगिताले संसारभरका सिर्जनाकर्मीहरूबाट यस्तो व्यापक प्रतिक्रिया पायो, जुन आयोजकहरूले पनि अपेक्षा गरेका थिएनन्।
विश्वभरका १५ हजारभन्दा बढी सामग्री सिर्जनाकर्मी, प्रभावशाली व्यक्तित्व, प्रमुख कार्यकारी अधिकृत र प्रविधि विशेषज्ञहरू जम्मा भए। Emirates Towers, Dubai International Financial Centre र Museum of the Future जस्ता प्रतिष्ठित स्थानहरूमा यो ए आइ फिल्म महोत्सव भएको थियो। तर यस सम्मेलनको सबैभन्दा चर्चित क्षण भयो — १० लाख अमेरिकी डलर पुरस्कार (नेपाली १५ करोड) पुरस्कार रकम सहितको AI Film Award को घोषणा। यस प्रतियोगितामा ११६ देशबाट ३,५०० भन्दा बढी AI फिल्महरू प्रविष्टि भएका थिए, र ३० हजारभन्दा बढी सहभागीले यसमा रुचि देखाएका थिए। जुरीले जम्मा ४०० घण्टाभन्दा बढी फिल्म हेरेर विजेता छान्नुपर्यो।
अन्ततः त्यो सम्मान पायो — ट्युनिसियाका स्टोरी टेलर जुबेर एलजलासी (Zoubeir Jlassi) ले, उनको नौ मिनेटको फ्रेन्च भाषी छोटो फिल्म “Lily” का लागि।
“Lily” — छोरीको नाममा बनेको कथा
रोचक कुरा के छ भने, फिल्मको नाम “Lily” निर्देशक जुबेर एलजलासीकी छोरीकै नामबाट राखिएको हो, जसले उनलाई यो कथा लेख्न प्रेरणा दिइन्।
फिल्मको कथा हो — वर्षाले भिजेको एउटा सहरमा बस्ने एक्लो अभिलेखकर्ता (archivist) को। उसले गरेको एउटा हिट-एन्ड-रन दुर्घटनापछि उसको गाडीको बम्परमा एउटा सानो पुतली अड्किन्छ। त्यो पुतली, जुन वास्तवमा दुर्घटनामा परेकी एउटी बालिकासँग आत्मिक रूपमा जोडिएकी थिइन्, अभिलेखकर्तालाई निरन्तर सताउँछ। LILY त्यो नाम उसले आफै पुतलीलाइ दिएको नाम थियो तर तर त्यो पुतली जसको थियो उनले पुतलीलाई “बेया” नाम दिएकी थिइन ।चलचित्रमा दिएका यी दुई नामहरु ‘लिली’ र ‘बेया’ खासमा जुबेर एलजलासीका आफ्नै छोरीहरुको नाम हो ।
कथाको नायक अन्ततः आफ्नो अपराधबोधसँग सामना गर्छ, प्रहरीसामु आफ्नो गल्ती स्वीकार्छ, र त्यो पुतली अस्पतालमा उपचाररत बालिकासँग फेरि मिलाइदिन्छ । आयोजकहरूका अनुसार यो फिल्म “डिजिटल उपकरणहरूको प्रयोग गरेर नैतिक सन्देश सहितको नाटक सिर्जना गरेकोमा” छानिएको हो।
फिल्म पूर्ण रूपमा Google का जेनेरेटिभ AI उपकरणहरू — Gemini, Veo 3, Imagen र Flow — प्रयोग गरेर बनाइएको थियो। प्रतियोगिताको नियमअनुसार कुनै पनि फिल्म कम्तीमा ७० प्रतिशत AI प्रविधिबाट सिर्जना गरिएको हुनुपर्थ्यो।
किन यो पुरस्कार खास छ?
शेखा लतिफाले पुरस्कार हस्तान्तरण गर्दै भनेकी थिइन् — यो पुरस्कारले डिजिटल सामग्री उद्योगलाई अगाडि बढाउन र युवाहरूलाई परम्परागत सीमा तोड्ने कामहरूबाट नवप्रवर्तन गर्न प्रोत्साहित गर्न मद्दत गर्नेछ।
यो पुरस्कारले एउटा स्पष्ट संकेत दिन्छ — AI फिल्म निर्माण अब कुनै प्रयोगात्मक वा सीमान्त विषय होइन। यो अब एउटा गम्भीर कलात्मक र व्यावसायिक शक्तिको रूपमा स्थापित हुँदैछ।
प्रविधिभन्दा माथि, मानवीय भावना
यहाँ एउटा रोचक विरोधाभास छ। AI ले दृश्य सिर्जना गर्न सक्छ, आवाज उत्पन्न गर्न सक्छ, सम्पूर्ण काल्पनिक संसार निर्माण गर्न सक्छ। तर पश्चाताप महसुस गर्ने, अपराधबोध बोक्ने, वा क्षमायाचना गरेर सत्यतर्फ फर्कने निर्णय गर्ने काम अझै पनि मानव कल्पना र भावनाकै हो।
“Lily” ले ठ्याक्कै यही देखायो — AI प्रविधिलाई प्रभुत्व जमाउने साधनको रूपमा नभई, मानवीय भावना र आशयलाई अझ गहिरो बनाउने माध्यमको रूपमा प्रयोग गरियो। परिणामस्वरूप फिल्मले AI-निर्मित सामग्रीमा प्रायः देखिने चिसो, यान्त्रिक सौन्दर्यबाट भिन्न, न्यानो र भावनात्मक गहिराइयुक्त दृश्य भाषा प्रस्तुत गर्यो।
साना कलाकारका लागि ठूलो आशा
यस घटनाले संसारभरका स्वतन्त्र र साना सिर्जनाकर्मीहरूका लागि एउटा महत्त्वपूर्ण सन्देश दिएको छ। हिजो फिल्म निर्माणका लागि ठूलो बजेट, विशाल स्टुडियो र सयौं प्राविधिक टोली आवश्यक पर्थ्यो। आज एउटा कोठामा बसेर काम गर्ने एक्ला सिर्जनाकर्मीले पनि उपयुक्त उपकरण र कथा भएमा विश्व मञ्चमा आफ्नो आवाज पुर्याउन सक्ने भएको छ।
जुबेर एलजलासी आफैं एक ग्राफिक डिजाइनर तथा फिल्म निर्माता हुन्, जसले AI लाई कुनै नौलो चमत्कारका रूपमा नभई सिर्जनात्मक साझेदारका रूपमा अँगालेका छन्। उनको काम कथाको गहिराइ, दृश्य कलात्मकता र बुद्धिमान मेसिनहरूले उब्जाउने नैतिक द्वन्द्वहरूमा केन्द्रित रहेको देखिन्छ।
प्रविधि जति नै आधुनिक भए पनि, क्यामेरा जति नै बदलिए पनि, फिल्म बनाउने तरिका जति नै फेरिए पनि — मानिस अझै त्यस्तै कथा खोजिरहेको छ, जसले उसलाई आफ्नै जीवन सम्झाओस्, भावुक बनाओस्, र फेरि एकपटक असल मानिस बन्न प्रेरित गरोस्।
“Lily” ले ठ्याक्कै त्यही गर्यो। र सायद त्यसैले यसले इतिहासकै सबैभन्दा ठूलो AI फिल्म पुरस्कार जित्यो — किनभने अन्ततः मानिसहरू प्रविधिबाट होइन, भावनाबाट नै प्रभावित हुन्छन्।
