अमेरिकाको ह्वाइट हाउसभित्र चार दशकभन्दा बढी समयसम्म राष्ट्रपतिहरूको आँखाअगाडि झुन्डिरहे पनि आम मानिसले कहिल्यै नदेखेको प्रसिद्ध कलाकार नर्मन रकवेलको दुर्लभ चित्रमाला पहिलोपटक सार्वजनिक प्रदर्शनीमा राखिएको छ।
“So You Want to See the President!” शीर्षकको यो चार भागमा बनेको चित्रमाला सन् १९४३ मा दोस्रो विश्वयुद्ध चलिरहेका बेला तयार गरिएको थियो। यसमा अमेरिकी राष्ट्रपति फ्र्याङ्कलिन डी. रुजवेल्टलाई भेट्न ह्वाइट हाउसको पश्चिमी कार्यालय (West Wing) बाहिर पालो कुर्दै गरेका विभिन्न वर्गका मानिसहरूको जीवन्त दृश्य चित्रण गरिएको छ।
चित्रमा सिनेटर, सैनिक अधिकारी, पत्रकार, गोप्य सुरक्षा अधिकारी, ‘मिस अमेरिका’, ह्वाइट हाउसका कर्मचारी र राष्ट्रपति रुजवेल्टका प्रिय कुकुर फालासम्मलाई रमाइला विवरणसहित उतारिएको छ। कलाकार रकवेल स्वयं पनि एउटा दृश्यमा पाइप चुस्दै समाचारपत्र पढिरहेको पात्रका रूपमा देखिन्छन्।
रकवेल अमेरिकी जनजीवनका सरल तर गहिरा कथा चित्रमार्फत सुनाउने कलाकारका रूपमा परिचित थिए। उनले यी दृश्य बनाउन ह्वाइट हाउसको प्रतीक्षालयमै घण्टौँ बसेर मानिसहरूको हाउभाउ र गतिविधि अवलोकन गरेका थिए। पछि उनको स्टुडियोमा आगलागी भएपछि हराएका प्रारम्भिक स्केच पुनः बनाउन उनी फेरि ह्वाइट हाउस पुगेका थिए।
यो चित्रमाला सुरुमा राष्ट्रपति रुजवेल्टका प्रेस सचिव स्टिफन टी. अर्लीका लागि बनाइएको थियो। पछि सन् १९७८ देखि ह्वाइट हाउसको वेस्ट विङमा राखियो, जहाँ जिमी कार्टरदेखि डोनाल्ड ट्रम्पसम्मका सबै अमेरिकी राष्ट्रपतिले यसलाई देखेका थिए।
तर चित्रको स्वामित्वलाई लिएर परिवारभित्र कानुनी विवाद सुरु भएपछि सन् २०२२ मा चित्र अर्लीका परिवारलाई फिर्ता गरियो। अन्ततः सन् २०२५ मा White House Historical Association ले यसलाई ७.२५ मिलियन अमेरिकी डलरमा खरिद गर्यो। यो संस्थाले अहिलेसम्म कला कृतिमा गरेको सबैभन्दा ठूलो खरिद मानिन्छ।
संस्थाका अध्यक्ष स्टुअर्ट म्याकलरिनका अनुसार यी चित्र कुनै निजी सङ्ग्रहमा हराउन नदिन र आम नागरिकले पनि ह्वाइट हाउसको इतिहास नजिकबाट अनुभव गर्न सकून् भन्ने उद्देश्यले खरिद गरिएको हो।
हाल यो ऐतिहासिक चित्रमाला वाशिङ्टन डी.सी.स्थित “The People’s House: A White House Experience” प्रदर्शनी केन्द्रमा पहिलोपटक सर्वसाधारणका लागि प्रदर्शन गरिएको छ। प्रदर्शनी सन् २०२७ को जुन महिनासम्म सञ्चालन हुने जनाइएको छ।
