भारतको गुजरातस्थित सुरतमा एक अनौठो घटना भएको छ। गहना बनाउने कम्पनीमा कम्प्युटर अपरेटरको रूपमा काम गर्ने ३२ वर्षीय मेयुर तारापराले आफ्नो चार औंला आफैं काटेका छन्।
प्रहरीको अनुसन्धानका क्रममा मेयुरले कामको अत्यधिक दबाब र पारिवारिक जिम्मेवारीका कारण जागिर छोड्न नसकेको र त्यसैले यस्तो कदम चालेको स्वीकार गरेका छन्।
उनले धारिलो हतियार प्रयोग गरी अमरोली रिङ रोडमा आफ्नो बायाँ हातका चार औंला काटेका थिए।
मेयुरले सुरुमा प्रहरीलाई वेदान्त सर्कल नजिक पिसाब फेर्ने क्रममा बेहोस भएको र होसमा आउँदा औंला काटिएको अवस्थामा आफूलाई फेला पारेको दाबी गरेका थिए।
उनका अनुसार, ८ डिसेम्बरमा साथीको घर जाँदै गर्दा रिङ रोडमा उनको टाउको दुख्न थाल्यो, चक्कर लाग्यो, र अचेत भई ढले। होस खुल्दा उनले औंला काटिएको पत्ता लगाए। बयानमा उनले आफ्नो औंला कसैले कालो जादुका लागि काटेको हुनसक्ने बताएका थिए। तर प्रहरीलाई उनको भनाइ बनावटी लाग्यो।
घटनास्थलमा कुनै प्रमाण फेला नपरेपछि प्रहरी शंका गर्न थाल्यो। उनका मोबाइल, मोटरसाइकल, र नगद सुरक्षित थिए, तर काटिएका औँला कहीँ भेटिएनन्।
पछि अनुसन्धानका क्रममा मेयुरले सत्य स्वीकार गरे। अत्यधिक कामको दबाब र जागिर छोड्न नसक्दा झोकमा उनले औंला काटेको बताए। उनले धारिलो चक्कु किनेपछि अमरोली रिङ रोडमा मोटरसाइकल रोकेर राति १० बजे चार औंला काटेका थिए। रक्तस्राव रोक्न उनले कुहिनोमा डोरी बाँधेका थिए र काटिएका औँला र चक्कु झोलामा राखेर फालेका थिए।
हाल प्रहरीले घटनाबारे थप अनुसन्धान गरिरहेको छ।
