र्यापर तथा सफ्टवेयर इन्जिनियर उत्साह जोशी (युनिक पोइट) र आर्टिफिसियल इन्टेलिजेन्स (एआई) को सहकार्यमा तयार गरिएको गीत ‘हेभी’ को म्युजिक भिडिओ शुक्रबार सार्वजनिक गरिएको छ। जोशीले उक्त भिडिओ आफ्नो युट्युब च्यानलमार्फत सार्वजनिक गरेका हुन्।
करिब चार महिनाअघि सार्वजनिक भएको ‘हेभी/शुभप्रभात‘ शीर्षकको गीतको शब्द जोशीले नै लेखेका हुन्। गीतको संगीत र महिला आवाज भने एआईले निर्माण गरेको हो।
“धेरैले यसमा गाउने नेपाली युवती को हुन् भनेर सोध्नुभएको थियो,” जोशीले भने, “गीतमा एआईकै आवाज र संगीत प्रयोग गरिएको हो।” यसका लागि उनले नि:शुल्क उपलब्ध सुनो एआई (Suno AI) टुलको प्रयोग गरेका थिए।
जोशीका अनुसार यस गीतको म्युजिक भिडिओले एआई र भर्चुअल रियालिटी (VR) का विषयलाई प्रेमिल ढंगले प्रस्तुत गरेको छ। भिडिओमा भर्चुअल रियालिटीको माध्यमबाट मानिसले कल्पनाभन्दा पर के गर्न सक्छन् भन्ने कथावस्तु समेटिएको छ।
उनले भिडिओको प्रेरणा नेटफ्लिक्सको चर्चित सिरिज ब्ल्याक मिरर बाट लिएको बताएका छन्। प्रविधिको नकारात्मक पक्षलाई उजागर गर्ने सिरिजका रूपमा ब्ल्याक मिरर परिचित छ।
यसअघि, नेपाली ब्यान्ड द भाइब्ज ले पनि एआईको प्रयोग गरी म्युजिक भिडिओ निर्माण गरिसकेको थियो। यो प्रविधि नेपाली संगीत क्षेत्रमा नयाँ सम्भावनाको संकेतको रूपमा हेरिएको छ।
