कृष्णपक्ष थापा
नेपालको वार्षिक कोस्प्ले फेस्टिभल ‘ओटाकु जात्रा’ मा दर्जनौँ उत्साहित कोस्प्लेयरहरूले भाग लिएर पप र एनिमे संस्कृतिलाई हिमाली देश नेपालमा जीवन्त बनाएका छन्।
‘ओटाकु जात्रा’ त्यस्तो अवसर हो, जहाँ प्रशंसक र उत्साहीहरूले आफ्ना मन पर्ने एनिमे पात्रहरूलाई लाइभ देख्न सक्छन्। यो वार्षिक कोस्प्ले महोत्सवले हजारौँ मानिसहरूलाई आकर्षित गर्दै नेपाली पप संस्कृतिको महत्त्वलाई उजागर गर्दै आएको छ।
२०१० मा सानो स्तरमा सुरु भएको यो उत्सवले २०१६ पछि ठुलो प्रभाव र व्यापक उपस्थिति देखाएको छ। अहिले यो महोत्सव कमिक्स, फ्यान आर्ट प्रतिस्पर्धाबाट कोस्प्ले र गेमिङतर्फ विस्तार हुँदै आएको छ।
पप संस्कृति र एनिमेप्रति आकर्षण
ओटाकु जात्रा यस्तो कार्यक्रम हो जसले किशोरवय र युवाहरूलाई पप संस्कृति र एनिमेबारे ज्ञान दिने प्रयास गर्छ । मानिसहरू कोस्प्ले, एनिमे पात्र र ती पात्रहरूको विशेषताबारे जिज्ञासा राख्छन् र बुझ्नका लागि यस्ता कार्यक्रममा उपस्थिति जनाउँछन्। नेपालका धेरै किशोर किशोरीलाई एनिमे र पप संस्कृतिका बारेमा कौतुहलता छ, तर त्यसलाई सम्बोधन गर्ने मञ्च भने थोरै मात्र छन् ।
‘कोस्ट्युम प्ले’ को संक्षेप रूप कोस्प्ले हो, जहाँ सहभागीहरूले विभिन्न एनिमे, मंगा, भिडियो गेम र टिभी सिरिजका पात्रहरूको पोसाक र सामानहरू प्रयोग गरेर तिनलाई प्रतिनिधित्व गर्छन्।
कोस्प्ले: एउटा मनोरञ्जनको संसार
बालबालिका, किशोर तथा युवाहरूका लागि यो निकै रमाइलो कुरा हो । यसले उनीहरूलाई एनिमे समुदाय भित्र विचरण गरेको अनुभव गराउँछ र धेरै कुराहरू एकसाथ ल्याउँछ ।
कोस्प्ले गर्ने परम्पराको सुरुवात २०औँ शताब्दीको सुरुवातमा न्युयोर्कमा आयोजित विज्ञान कथा सम्मेलनहरूबाट भएको विश्वास गरिन्छ। ‘कोस्प्ले’ शब्द जापानमा २०औँ शताब्दीको मध्यतिर सिर्जना भएको हो। जापानी एनिमेले युवाहरूलाई निकै गहिरो रूपमा प्रभाव पारेको छ र आज यो उनीहरूको जीवनको अभिन्न अंश बनेको छ।
एनिमे: कार्टुनभन्दा धेरै विशेष
जापानी एनिमे सामान्य कार्टुनभन्दा धेरै फरक शैलीको छ। यो रोमान्स, विज्ञान कथा, भय र यथार्थपरक विषयवस्तुमा आधारित हुन्छ। कार्टुन प्रायः मनोरञ्जनका लागि बनाइन्छ भने एनिमे मानव जीवन र भावना नजिक हुने विषयवस्तुमा केन्द्रित हुन्छ । एनिमेले मानवीय भावना र अनुभूतिका व्यापक तथा विविध आयामहरूलाई प्रस्तुत गरेको हुन्छ ।
पहिलो पटक १९६३ मा जापानका टेलिभिजनमा ‘अस्ट्रो ब्वाइ’ प्रसारण भएको थियो। त्यसयता अमेरिकन र युरोपेली देशहरूले पनि एनिमे निर्माण गरेर यसलाई विश्वव्यापी लोकप्रिय बनाएका छन्।
युवा पुस्ताको आकर्षण
‘जेन्जी’ पुस्ताले एनिमेलाई केवल मनोरञ्जनको माध्यम मात्र नभएर जीवनका सीप, सङ्घर्ष, मित्रता, साहस, लक्ष्यप्रति लगाव र समय व्यवस्थापन सिक्ने स्रोतको रूपमा स्वीकार गरिरहेको छ। यिनै विशेषताहरूले युवाहरूलाई एनिमेप्रति आकर्षित बनाएको छ।
नेपालमा ‘ओटाकु जात्रा’ जस्ता महोत्सवहरूमा युवाहरूको आकर्षण हेर्दा पप र एनिमे संस्कृतिप्रति नेपाली युवा पुस्ताको माया झल्किएको देख्न सकिन्छ ।
